23-5-09 @ 探訪老友 Terry 家

老友 Terry 搬左去葵芳住, 梗係要約埋一班朋友去 Terry 家到看看啦。 老 Paul, 阿滔同佢女友及我一齊上去, 但可惜謝智偉同李偉權亦唔能夠黎, 真可惜, 如果齊人就好啦, 因為太耐無見可以齊人同聚下...

約左係新都城 "豐澤" 度等, 大家夾份買左個微波爐比 Terry 做入伙禮物。 之後就直去 Terry 屋企, 真係如 Terry 所講地鐵好近佢屋企, 好快就上到佢屋企, 感覺真係唔錯, 比想像中大同乾淨, Terry 介紹佢屋企後, 我地一班人就玩大富翁, 因為阿滔女友唔舒服, 我地玩左一舖後食野, 我地嗌左 "Pizza Hut" , 食完就再玩過大富翁, 原本再諗住玩多一陣, 可惜太夜阿滔女友要走, 所以阿滔同佢女友走先 ... 咁 Terry, 老 Paul 同我三個就吹多陣水, 我地真係老啦, 大家傾計都圍繞結緍呀, 工作呀既話題, 但真係太耐無見啦 (同老 Paul 都起碼成年無見), 果刻我又回想番大家十幾年前重一齊讀書果段時光, 好似昨日既事咁, 真係唔覺我地由讀書後分開左十幾年, 依刻我感覺真係友情無價...

老 Paul 都就快結緍, 希望老 Paul 都生生性性啦 (講笑 ^^), 有個幸福婚姻啦!

見到 Terry 搬出黎, 自己都希望快 d 都好似 Terry 咁搬出黎過自己既生活啦, 到時再約齊成班出黎再吹過水!


同老 Paul 都起碼成年無見, 梗係要影番張相留念啦~~

18/5/09 - 休閒一天 + 回憶

終於辭左職啦, 比自己休息一天差電, 真係成個精神晒 (同以往放假唔同, 今次因為唔駛諗住公司既野, 真正既休息, 我等左好耐啦 ~~~ )

咁耐無 update 個 blog, 因為自己要考試 (考番會考英文), 好, 言歸正傳, 今次想講既唔係考成點, 而係想講而家 d 考生同我十幾年前中五時真係好大分別, 以前 d 食煙既係 "理" 埋一邊食, 而家直情係學校門口食, 真係唔 "瀉" 你。 到正題啦, 而家既中五女生同以前比真係唔同晒, 打扮同以前真係天壤之別, 以前果 d 讀書既係 "薯" 同 "實力派", 而家好多都打扮好 "潮" 同好識打扮, 唔怪之得而家 d "0靚" 仔無心機讀書啦, 仲有既係, 考試最早走個班反而係 d "薯" 同 "實力派"既女仔, 真係唔係親身體驗都唔信 >_<

還有老友 Terry 終於如願如女友搬出去住啦, 係度恭喜佢先 ~~~ (希望我都可以盡快實現願望啦!)